OLXలో వెలుగు చూసిన మరో మోసం, తక్కువ ధరకే ఐఫోన్ అంటూ బురిడీ

ఓఎల్‌ఎక్స్ వెబ్‌సైట్లో ఐఫోన్ 6 కేవలం రూ.12,500 కే....

ఓఎల్‌ఎక్స్ అనే క్లాసిఫైడ్ వెబ్‌సైట్లో ఐఫోన్ 6 కేవలం రూ.12,500 కే వస్తుందన్న ప్రకటన తెలుసుకున్న అమన్ అనే వ్యక్తి సదరు ప్రకటన ఇచ్చిన వ్యక్తికి ఫోన్ చేసి ఆ మొత్తాన్ని, మరో రూ.1550 కొరియర్ ఖర్చులను కలిపి మొత్తం సొమ్మును అవతలి వ్యక్తికి పేటీఎం చేశాడు.

ఫోన్ డెలివరీ కాలేదు...

కానీ చాలా రోజులు అవుతున్నా ఇప్పటి వరకు అమన్‌కు ఫోన్ డెలివరీ కాలేదు. అలాగే మరో ఘటనలో ఓ వ్యాపారవేత్త తన కుమారుడికి ఐఫోన్ 8 ప్లస్ కొనాలనే ఉద్దేశంతో అదే సైట్‌లో ప్రకటనలు చూశాడు. వాటిల్లో పాత ఐఫోన్ ఎక్స్‌చేంజ్ చేస్తే రూ.16వేలకే కొత్త ఐఫోన్ 8 ప్లస్ ఇస్తామని ఓ వ్యక్తి ప్రకటన ఇవ్వడంతో ఆ వ్యాపారవేత్త ఫోన్ ఖరీదుతోపాటు మరో రూ.4వేలు అదనపు చార్జిలు కలిపి రూ.20వేలను అవతలి వ్యక్తికి చెల్లించాడు. కానీ నెలలు గడుస్తున్నా అతనికి ఐఫోన్ డెలివరీ కాలేదు.

ఆర్మీలో పనిచేస్తున్న సిబ్బందిగా పరిచయం చేసుకున్నారు.....

అయితే ఈ రెండు ఘటనల్లోనూ ప్రకటనలు పెట్టిన ఆ వ్యక్తులు తమను తాము బాధితులకు ఆర్మీలో పనిచేస్తున్న సిబ్బందిగా పరిచయం చేసుకున్నారు. ఆ మేరకు వారు నకిలీ ఐడీ కార్డులు, ఆధార్ కార్డులను కూడా బాధితులకు ఇచ్చారు. వాటిని నమ్మిన బాధితులు నిజంగానే ఐఫోన్లను తక్కువకు కొనవచ్చని ఆశపడి అంత డబ్బును నష్టపోయారు.

ఈ ఘటనలపై సైబర్ క్రైం పోలీసులు స్పందిస్తూ....

కాగా ఈ ఘటనలపై అక్కడి సైబర్ క్రైం పోలీసులు స్పందిస్తూ ఆన్‌లైన్‌లో చాలా తక్కువ ధరలకే వస్తువులను అమ్ముతామంటూ వ్యక్తులు ఇచ్చే ప్రకటనలు నమ్మి మోసపోవద్దని చెబుతున్నారు. వినియోగదారులు తమకు తెలిసిన వ్యక్తుల నుంచే వస్తువులను కొనుగోలు చేయాలని సూచిస్తున్నారు.