బడ్జెట్ ల్యాప్‌టాప్స్‌ కోసం స్నాప్‌డ్రాగన్ ఎక్స్ లాంచ్.. అదిరేటి పర్ఫార్మెన్స్ గ్యారెంటీ!

క్వాల్‌కామ్ కంపెనీ మోస్ట్ పవర్‌ఫుల్ ప్రాసెసర్లు లాంచ్ చేస్తూ ప్రపంచవ్యాప్తంగా టెక్నాలజీ ప్రియులను ఆకర్షిస్తుంటుంది. అయితే తాజాగా CES 2025లో క్వాల్‌కామ్ సరికొత్త స్నాప్‌డ్రాగన్ X ప్రాసెసర్‌ను లాంచ్ చేసింది. ఇది తక్కువ ధరలో లభించే ల్యాప్‌టాప్స్‌కు అదిరిపోయే పర్ఫార్మెన్స్ అందించనుంది.

గతంలో వచ్చిన X ఎలైట్ చిప్‌సెట్లు అనుకున్నంత విజయం సాధించకపోయినా, ఈ సరికొత్త చిప్ మాత్రం టెక్ నిపుణులను, వినియోగదారులను ఒకేసారి ఆకర్షిస్తోంది.

దీనికి తోడు, ARM కంపెనీతో జరుగుతున్న లీగల్ ఫైట్ కూడా హాట్ టాపిక్‌గా మారింది. అయితే క్వాల్‌కామ్ మాత్రం వెనక్కి తగ్గకుండా, పవర్ ఫుల్ ఫీచర్లతో స్నాప్‌డ్రాగన్ ఎక్స్‌ను తీసుకొచ్చింది. దీన్ని సాధారణ ప్రజలు కొనుగోలు చేసే బడ్జెట్ ల్యాప్‌టాప్‌ల కోసం ప్రత్యేకంగా రూపొందించారు.

X ఎలైట్, X ప్లస్ వంటి హై-ఎండ్ ప్రాసెసర్లు మాత్రం టాప్-ఎండ్ డివైజ్‌లలో మాత్రమే కనిపించనున్నాయి.

* ఫీచర్లు

స్నాప్‌డ్రాగన్ X ప్లాట్‌ఫామ్‌లో X1-26-100 అనే ఒకే ఒక్క ప్రాసెసర్ మోడల్ అందుబాటులో ఉంది. ఇందులో అదిరిపోయే ఫీచర్లు ఉన్నాయి. 8 ఒరియన్ కోర్లతో కూడిన CPU 3.0 GHz వేగంతో పనిచేస్తుంది. 30 MB క్యాష్ మెమరీ ఉండటంతో డేటా ప్రాసెసింగ్ చాలా ఫాస్ట్‌గా ఉంటుంది.

1.7 టెరాఫ్లాప్స్ సామర్థ్యం గల క్వాల్‌కామ్ అడ్రెనో GPUతో గ్రాఫిక్స్-ఇంటెన్సివ్ టాస్క్‌లు, గేమింగ్, వీడియో ఎడిటింగ్ వంటివి సింగిల్ ల్యాగ్ లేకుండా హ్యాండిల్ చేయొచ్చు. ప్రత్యేకంగా AI కోసం రూపొందించిన హెక్సాగన్ NPU 45 TOPS (టెరా ఆపరేషన్స్ పర్ సెకండ్) పర్ఫార్మెన్స్ అందిస్తుంది. ఇది X ఎలైట్ చిప్‌సెట్‌తో సమానం.

64GB వరకు LPDDR5x RAMను సపోర్ట్ చేస్తుంది, దీని డేటా ట్రాన్స్‌ఫర్ స్పీడ్ 135GB/s. డిస్‌ప్లే విషయానికొస్తే, ఒకేసారి మూడు 4K/60Hz ఎక్స్‌టర్నల్ డిస్‌ప్లేలను కూడా హ్యాండిల్ చేయగలదు. కనెక్టివిటీలోనూ ఏ మాత్రం తగ్గలేదు. 5G, Wi-Fi 7, బ్లూటూత్ 5.4, USB 4 టైప్-C పోర్ట్‌లు ఉన్నాయి.

ఈ స్నాప్‌డ్రాగన్ X ప్రాసెసర్ విండోస్ 11 ఆపరేటింగ్ సిస్టమ్‌తో పనిచేస్తుంది. అంతేకాదు, క్వాల్‌కామ్ AI-based కోపైలట్+ ఫీచర్లను కూడా సపోర్ట్ చేస్తుంది. అంటే బడ్జెట్ ల్యాప్‌టాప్‌లలో కూడా అత్యాధునిక AI ఫీచర్లను ఉపయోగించుకోవచ్చు.

ఇన్‌స్టంట్ వేక్, తక్కువ పవర్ వినియోగంతో స్టాండ్‌బై మోడ్, ఎక్కువ బ్యాటరీ లైఫ్ వంటి ఫీచర్లూ ఉన్నాయి. పోటీదారుల ప్రాసెసర్లతో పోలిస్తే స్నాప్‌డ్రాగన్ X బ్యాటరీ లైఫ్ రెండింతలు ఎక్కువగా ఉంటుందని, పనితీరు 163% వేగంగా ఉంటుందని క్వాల్‌కామ్ చెబుతోంది.

ధర

స్నాప్‌డ్రాగన్ X ప్రాసెసర్ కలిగిన ల్యాప్‌టాప్స్‌ 500 -
600 డాలర్ల (సుమారు రూ.41-రూ.49 వేల ) మధ్య ఉండొచ్చని అంచనా వేస్తున్నారు. డెల్, HP, లెనోవో, ఏసర్, ఆసుస్ వంటి ప్రముఖ బ్రాండ్ల ద్వారా 2025 ప్రారంభం నుంచి ఈ ల్యాప్‌టాప్స్‌ మార్కెట్లోకి రానున్నాయి.

క్వాల్‌కామ్ వ్యూహం

PC పరిశ్రమలో తన మార్కెట్ వాటాను పెంచుకోవాలనే లక్ష్యంతో క్వాల్‌కామ్ ఈ కొత్త ప్రాసెసర్‌ను విడుదల చేసింది. X ఎలైట్, X ప్లస్ చిప్‌లు ప్రీమియం ల్యాప్‌టాప్‌లను లక్ష్యంగా చేసుకుంటే, స్నాప్‌డ్రాగన్ X మాత్రం బడ్జెట్-ఫ్రెండ్లీ ల్యాప్‌టాప్ సెగ్మెంట్‌పై గురి పెట్టింది. ఈ సెగ్మెంట్‌లో ఇంటెల్, AMD చిప్‌లకు గట్టి పోటీ ఇవ్వనుంది.

AI ఫీచర్లు, మెరుగైన బ్యాటరీ పనితీరుతో ఎక్కువ మంది కొనుగోలుదారులను ఆకర్షించవచ్చని క్వాల్‌కామ్ ఆశిస్తోంది. ప్రస్తుతం స్నాప్‌డ్రాగన్ X ప్రాసెసర్లను ఉపయోగించి 60కి పైగా ల్యాప్‌టాప్‌లు తయారవుతున్నాయి. 2026 నాటికి ఈ సంఖ్య 100కు పైగా పెరుగుతుందని క్వాల్‌కామ్ అంచనా వేస్తోంది.