సినిమా హాల్ మీ ఇంట్లోనే.. ఇండియాలో TCL 115-అంగుళాల టీవీ లాంచ్.. కారు కంటే కాస్ట్లీ!

భారీ టీవీలంటే ఇష్టమా.. మీ ఇంట్లో సినిమా థియేటర్‌ను తలపించే అనుభూతిని పొందాలనుకుంటున్నారా.. అయితే TCL మీకోసం అదిరిపోయే టెలివిజన్‌ను తీసుకొచ్చింది. ప్రముఖ ఎలక్ట్రానిక్స్ తయారీ సంస్థ TCL, ఇండియాలో ఏకంగా 115 అంగుళాల QD మినీ LED టీవీని విడుదల చేసింది.

దీని పేరు '115X99 మాక్స్'. దీని ధర అక్షరాలా రూ.29,99,900. అవును, ఈ టీవీ కొనాలంటే ఖరీదైన కారుకి సమానమైన డబ్బు వెచ్చించాల్సిందే. ప్రపంచంలోనే అతిపెద్ద స్మార్ట్ టీవీల్లో ఇది కూడా ఒకటి.

* ఇండియాలో సేల్‌కు సిద్ధం..

ఈ టీవీని మొట్టమొదట అమెరికాలోని లాస్ వెగాస్‌లో జరిగిన కన్స్యూమర్ ఎలక్ట్రానిక్స్ షో (CES)లో ప్రదర్శించారు. ఇప్పుడు ఇండియాలో కూడా సందడి చేయడానికి సిద్ధమైంది. ఇప్పటికే ప్రీ-బుకింగ్స్ ప్రారంభమయ్యాయి.

త్వరలోనే రిలయన్స్ డిజిటల్, క్రోమా వంటి ఎంపిక చేసిన రిటైల్ స్టోర్స్‌లో ఈ టీవీ అందుబాటులో ఉండనుంది. అంతేకాదు, అమెజాన్ ఇండియా, ఫ్లిప్‌కార్ట్ వంటి ఆన్‌లైన్ ప్లాట్‌ఫామ్స్‌ ద్వారా కూడా దీన్ని కొనుగోలు చేయవచ్చు.

* మరో టీవీ ఫ్రీ..

ఇక్కడ ఒక అదిరిపోయే ఆఫర్ కూడా ఉంది. ఈ టీవీని ప్రీ-బుక్ చేసుకున్న వారికి TCL ఏకంగా 75-అంగుళాల QLED టీవీని ఉచితంగా అందిస్తోంది. అంటే దాదాపు రెండు టీవీలు ఒకే ధరకు అన్నమాట.

ఈ సందర్భంగా TCL ఇండియా జనరల్ మేనేజర్ ఫిలిప్ జియా మాట్లాడుతూ, "టీవీ పరిశ్రమలో సరికొత్త ఆవిష్కరణలకు మేము మార్గదర్శకంగా ఉండాలనుకుంటున్నాం. 115X99 మాక్స్ కేవలం అధునాతన సాంకేతికత మాత్రమే కాదు, ఇది మా భారతీయులకు బెస్ట్ ఎంటర్‌టైన్‌మెంట్ ఎక్స్‌పీరియన్స్ అందిస్తుంది" అని అన్నారు.

* TCL 115-అంగుళాల టీవీలో ప్రత్యేకతలు..

ఈ టీవీ గూగుల్ టీవీ ఆపరేటింగ్ సిస్టమ్‌పై పనిచేస్తుంది. దీని ద్వారా మీకు నచ్చిన యాప్స్‌ను సులభంగా యాక్సెస్ చేయవచ్చు. అలాగే మీకు కావాల్సిన కంటెంట్‌ను స్ట్రీమ్ చేసుకోవచ్చు.

డిస్‌ప్లే విషయానికొస్తే, ఇది 98% DCI-P3 కలర్ రేంజ్‌ను సపోర్ట్ చేస్తుంది. దీనివల్ల మీకు కళ్లు చెదిరే రంగులు కనిపిస్తాయి. పిక్చర్ క్వాలిటీ అదిరిపోతుంది. ఈ టీవీలో ఉన్న AiPQ ప్రో ప్రాసెసర్ అనేది ఆర్టిఫిషియల్ ఇంటలిజెన్స్ సహాయంతో పిక్చర్, సౌండ్ క్వాలిటీని మరింత మెరుగుపరుస్తుంది.

ఇంకా ఇందులో HDR5000 అనే అడ్వాన్స్‌డ్ ఫీచర్ ఉంది. ఇది పిక్చర్‌ను మరింత ప్రకాశవంతంగా, స్పష్టంగా చూపిస్తుంది. అలాగే TCL పేటెంట్ పొందిన T-స్క్రీన్ అల్ట్రా టెక్నాలజీతో వస్తుంది. ఇది కాంట్రాస్ట్‌ను పెంచుతుంది, ఇమేజ్ రిటెన్షన్‌ను తగ్గిస్తుంది. అంటే స్క్రీన్ మీద బొమ్మలు అతుక్కుపోయినట్లుగా కనిపించకుండా చేస్తుంది.

డాల్బీ విజన్ IQ, HDR10+ ఫార్మాట్‌లకు కూడా ఈ టీవీ సపోర్ట్ చేస్తుంది. దీనివల్ల మీకు ప్రీమియం వ్యూయింగ్ ఎక్స్‌పీరియన్స్ కలుగుతుంది. ఈ టీవీకి TUV సర్టిఫికేషన్ లభించింది. అంటే ఇది బ్లూ లైట్, ఫ్లికర్‌ను తగ్గిస్తుంది. దీనివల్ల మీ కళ్లకు ఎలాంటి ఇబ్బంది ఉండదు.

సౌండ్ విషయానికొస్తే, ఇందులో బిల్ట్-ఇన్ ఆంకియో 6.2.2 హై-ఫై సౌండ్ సిస్టమ్ ఉంది. ఇది అద్భుతమైన, లీనమయ్యే ఆడియో అనుభవాన్ని అందిస్తుంది. సినిమా చూస్తున్నా లేక పాటలు వింటున్నా, శబ్దాలు చాలా స్పష్టంగా మరియు బలంగా వినిపిస్తాయి.

* గేమర్స్‌కు పండగ..

ఈ టీవీ గేమర్స్‌కు నిజంగా పండగే అని చెప్పాలి. ఇందులో ఉన్న గేమ్ మాస్టర్ టెక్నాలజీ 144Hz రిఫ్రెష్ రేట్‌ను అందిస్తుంది. అంటే స్క్రీన్ చాలా స్మూత్‌గా ఉంటుంది. అంతేకాదు, ఆటో లో లేటెన్సీ మోడ్ (ALLM)తో కేవలం 10ms రెస్పాన్స్ టైమ్‌ ఆఫర్ చేస్తుంది. దీనివల్ల గేమింగ్ సమయంలో ల్యాగ్ ఉండదు.

ఫ్రీసింక్ ప్రీమియం ప్రో ఫీచర్ స్క్రీన్ టేరింగ్ లేకుండా స్మూత్ గేమింగ్‌ను అందిస్తుంది. గేమ్ బార్ అనేది రియల్-టైమ్ స్టాట్స్‌ను చూపిస్తుంది. ఇంకా గేమ్ యాక్సిలరేటర్ ఫీచర్ ఫాస్ట్-పేస్డ్ గేమ్స్‌లో పెర్ఫార్మెన్స్‌ను పెంచుతుంది. కాబట్టి, ఈ టీవీలో గేమ్స్ ఆడుతుంటే అద్భుతమైన అనుభూతి కలుగుతుంది.

* మరికొన్ని విశేషాలు

ఈ టీవీలో మల్టీ-వ్యూ 2.0 అనే ఫీచర్ ఉంది. దీని ద్వారా ఒకేసారి రెండు స్క్రీన్లను చూడవచ్చు. ఇది యాపిల్ హోమ్‌కిట్ , ఎయిర్‌ప్లే 2కు కూడా సపోర్ట్ చేస్తుంది. కాబట్టి మీరు మీ యాపిల్ డివైజ్‌లను సులభంగా కనెక్ట్ చేసుకోవచ్చు.