ఇండియాలో వివో భారీ పెట్టుబడులు, వేల ఉద్యోగాలు

అదనంగా మరో రూ.3,500 కోట్లు

వివో గతేడాది భారత్‌లో రూ.4,000 కోట్లు పెట్టుబడులు పెడతామని ప్రకటించిన విషయం అందరికీ తెలిసిందే. కాగా కంపెనీ ఇప్పుడు వీటికి అదనంగా మరో రూ.3,500 కోట్లు ఇన్వెస్ట్ చేస్తామని వెల్లడించంది. దేశంలో తయారీ ప్లాంట్ల కార్యకలాపాలను మరింత విస్తారించాలని కంపెనీ భావిస్తోంది. అందుకే ఇంత భారీ స్థాయిలో పెట్టుబడులు పెట్టేందుకు సిద్దమౌతోంది.

అమ్మకాల తగ్గుదల

దేశంలో ఆటోమొబైల్స్, కన్సూమర్ డ్యూరబుల్స్, ఫాస్ట్ యూవింగ్ కన్సూమర్ గూడ్స్ (ఎఫ్ఎంసీజీ) రంగాలు అమ్మకాల తగ్గుదలతో తీవ్ర ఒత్తిడిని ఎదుర్కొంటున్న సమయంలో బీబీకే గ్రూప్‌కు చెందిన వివో భారీ పెట్టుబడులు పెడతామని ప్రకటించడం టెక్ వర్గాల్లో ఆలోచనలను రేకెత్తిస్తోంది. ఇదిలా ఉంటే మారుతీ సహా పలు కంంపెనీలు రుణభారాన్ని తగ్గించుకునేందుకు ఉద్యోగులను తొలగిస్తున్నాయి.

పదేళ్ల కాలంలో 40,000 మందికి ఉపాధి అవకాశాలు

భారత్ మాకు చాలా ప్రధానమైన మార్కెట్. ఇక్కడ బలమైన కంపెనీగా ఎదగాలని భావిస్తున్నాం. మొత్తం రూ.7,500 కోట్ల పెట్టుబడులను దశల వారీగా ఇన్వెస్ట్ చేస్తాం' అని వివో ఇండియా డైరెక్టర్ (బ్రాండ్ స్ట్రాటజీ) నిపుణ్ మర్యా తెలిపారు. తమ భారీ పెట్టుబడులతో వచ్చే పదేళ్ల కాలంలో 40,000 మందికి ఉపాధి అవకాశాలు లభిస్తాయని పేర్కొన్నారు. ఇప్పటిదాకా గ్రేటర్ నోయిడా ఫెసిలిటీపై రూ.400 కోట్లు ఇన్వెస్ట్ చేసింది.

ఏడాదికి 3.34 కోట్ల ఫోన్లు

గ్రేటర్ నోయిడాలోని ప్లాంటులో ఏడాదికి 2.5 కోట్ల ఫోన్లు తయారు చేస్తున్నారు. ఈ ప్లాంటు 7,500 మందికి ఉపాధి కల్పిస్తోంది. ఇప్పుడు ఈ ప్లాంటు సామర్థ్యాన్ని మరింత పెంచాలని చూస్తోంది. సెప్టెంబర్ నుంచి ఈ ప్లాంటులో ఏడాదికి 3.34 కోట్ల ఫోన్లు తయారు కానున్నాయి. అలాగే ఉద్యోగుల సంఖ్య 10 వేలకు పెరగనుంది. స్మార్ట్‌ఫోన్ మార్కెట్ వాటా పరంగా భారత్‌లో షియోమి, శాంసంగ్ తర్వాత వివో మూడో స్థానంలో ఉంది. కంపెనీ త్వరలోనే వివో జెడ్1ఎక్స్ ఫోన్‌ను మార్కెట్‌లో లాంచ్ చేయనుంది.