ప్రపంచంలోనే తొలిసారిగా హ్యూమనాయిడ్ రోబోల మధ్య బాక్సింగ్ మ్యాచ్.. ఎప్పుడంటే..?

Humanoid Robot Boxing Match : చరిత్రలో మొదటిసారిగా, మనుషులలాగే కనిపించే రోబోల మధ్య బాక్సింగ్ పోటీ జరగబోతోంది. చైనాకు చెందిన 'యూనిట్రీ' అనే రోబోటిక్స్ కంపెనీ ఈ అసాధారణమైన ఈవెంట్‌ను ప్రకటించింది. "యూనిట్రీ ఐరన్ ఫిస్ట్ కింగ్: అవేకనింగ్" అనే పేరుతో వచ్చే నెలలో ఈ పోటీ జరగనుంది. అంతేకాదు, ఈ యాక్షన్‌ను మనం ఇంట్లో కూర్చొని లైవ్‌స్ట్రీమ్‌లో చూడొచ్చు.

* రింగ్‌లో దిగబోయేది యూనిట్రీ G1 రోబోనా?
హ్యూమనాయిడ్ రోబోలు ఎంత చురుగ్గా మారాయి, వాటి వేగం, పోరాడే శక్తి ఎంత పెరిగిందో చూపించడానికి ఇదొక పెద్ద ముందడుగు అని చెప్పొచ్చు. ఏ రోబోలు ఈ బాక్సింగ్‌లో పాల్గొంటాయో యూనిట్రీ ఇంకా అధికారికంగా చెప్పలేదు కానీ, ఎక్కువగా ఆ కంపెనీకి చెందిన G1 హ్యూమనాయిడ్ రోబోలే బరిలోకి దిగే అవకాశం ఉంది.

ఈ రోబోలు సుమారు 4.33 అడుగుల ఎత్తు ఉంటాయి. వీటిని ముఖ్యంగా చురుకుదనం, సులభంగా కదిలేలా (Flexibility) తయారుచేశారు. బరువు తక్కువగా, చిన్నగా ఉండటం వల్ల వేగంగా కదలగలవు. ఈ G1 రోబోలో ఆక్టా-కోర్ ప్రాసెసర్, శక్తితో పనిచేసే కీళ్లు ఉంటాయి.

అలాగే 3D LiDAR, రియల్ సెన్స్ డెప్త్ కెమెరాలు, శబ్దాన్ని తగ్గించే మైక్రోఫోన్ వంటి ఫీచర్లున్నాయి. ఇది 9,000mAh బ్యాటరీతో పనిచేస్తుంది. దీని ధర తక్కువగా ఉండటం, చిన్న సైజులో ఉండటం వల్ల దీన్ని ఎక్కువగా పరిశోధకులు, రోబో టెక్నాలజీపై ఆసక్తి ఉన్నవారు వాడుతుంటారు.

* H1 రోబో కూడా పోటీలో ఉండొచ్చా?
యూనిట్రీ కంపెనీకి చెందిన మరో శక్తివంతమైన రోబో H1 కూడా ఈ పోటీలో పాల్గొనవచ్చని కొందరు అంచనా వేస్తున్నారు. ఇది G1 కంటే పెద్దది, దాదాపు 5 అడుగుల 11 అంగుళాల ఎత్తు ఉంటుంది. ఇది కంపెనీ ప్రధాన (Flagship) రోబో. G1తో పోలిస్తే దీని కదలికల నియంత్రణ, బ్యాలెన్స్, కంప్యూటింగ్ పవర్ ఇంకా మెరుగ్గా ఉంటాయి.

దీని ధర 16,000 (సుమారు రూ.13 లక్షలు). మనిషి లాంటి కదలికలు ఎలా చేస్తుందో చూపించే ప్రదర్శనల్లో దీన్ని ఇప్పటికే ఉపయోగించారు. ఈ బాక్సింగ్ మ్యాచ్ ఎలా ఉండబోతుందో ఊరిస్తూ యూనిట్రీ ఇటీవల ఒక ప్రోమో వీడియో విడుదల చేసింది. వీడియో మొదటి భాగంలో G1 రోబో నిజమైన బాక్సర్‌తో ప్రాక్టీస్ (స్పారింగ్) చేయడం చూపించారు.

ఆ రోబో దెబ్బలు తట్టుకొని, కింద పడినా వెంటనే లేవగలిగింది. కానీ, దాని రియాక్షన్ టైమ్ కొంచెం నెమ్మదిగా ఉండటం, వేగంగా దెబ్బల నుంచి తప్పించుకోలేకపోవడం, అప్పుడప్పుడు బ్యాలెన్స్ తప్పడం కనిపించింది. వీడియో రెండో భాగంలో రెండు రోబోలు ఒకదానితో ఒకటి పోరాడుతూ, అచ్చం అడ్వాన్స్‌డ్ కుంగ్ ఫూ టెక్నిక్స్ లాంటి మూవ్స్ చేశాయి.

* ఈ కదలికల వెనుక రహస్యం
ఇది చూశాక, పోటీ కోసం రోబోలకు ఏమైనా ప్రత్యేక అప్‌గ్రేడ్‌లు చేశారా లేదా కొత్తగా ప్రోగ్రామింగ్ ఏమైనా మార్చారా అనే సందేహాలు మొదలయ్యాయి. యూనిట్రీ తమ రోబోలకు మనుషుల మాదిరి సహజమైన, పూర్తి శరీర కదలికలు నేర్పించడంపై చాలా దృష్టి పెట్టింది. ఇందుకోసం LAFAN1 అనే మోషన్ క్యాప్చర్ టెక్నాలజీ ఆధారిత డేటాసెట్‌ను వాడుతున్నారు.

ఈ టెక్నాలజీ సహాయంతో, రోబోల కీళ్ల కదలికల పరిమితులు, వేగం, సామర్థ్యాలను పాటిస్తూనే, నిజమైన మనుషుల కదలికలను అనుకరించేలా రోబోలకు నేర్పిస్తున్నారు. నడవడం, డ్యాన్స్ చేయడం, చివరికి ప్రఖ్యాత ఆటగాళ్ల కదలికలను కూడా అనుకరించడంలో ఈ రోబోలకు మంచి శిక్షణ ఇచ్చారు.

* భారీ పోరు కోసం శిక్షణ ఇంకా కొనసాగుతోంది..
వీడియోలో రోబోల ఫైటింగ్ చూడటానికి అదిరిపోయినా, బాక్సింగ్ కోసం వాటికి ఇంకా శిక్షణ ఇస్తున్నామని యూనిట్రీ వారే చెప్పారు. వాటి మధ్య సమన్వయం (Coordination), దెబ్బలను తప్పించుకోవడం (Dodging), బ్యాలెన్స్ వంటి విషయాలను మెరుగుపరచడానికి వారి టీమ్ ఇంకా కష్టపడుతూనే ఉంది.

అసలు పోటీకి ఇంకా కొన్ని వారాల సమయం ఉంది కాబట్టి, ఈలోపు మరిన్ని మెరుగులు దిద్దే అవకాశం ఉంది. ఈ రాబోయే మ్యాచ్ కేవలం ఒక ఆట కాదు, ఇది రోబోటిక్స్ టెక్నాలజీ భవిష్యత్తు ఎలా ఉండబోతుందో చూపించే ఒక చిన్న ట్రైలర్ లాంటిది. రింగ్‌లో చిన్న G1 రోబో ఉన్నా, బలమైన H1 రోబో ఉన్నా, యూనిట్రీ మాత్రం ప్రపంచం ఇంతకు ముందెన్నడూ చూడని ఒక సరికొత్త టెక్నాలజీ పోరుకు రంగం సిద్ధం చేస్తోంది.