విధిని జయించిన వీరుడు ఏలియన్స్ మీద చెప్పిన ఆసక్తికర విషయాలు

ఇతర గ్రహాలపై జీవం ఉందా

ఇతర గ్రహాలపై జీవం ఉందా అనే ప్రశ్న చాలా కాలంగా శాస్త్రవేత్తల మెదళ్లను తొలచివేస్తోంది. ఈ ప్రశ్నకు సమాధానమిచ్చారు ప్రముఖ భౌతిక శాస్త్రవేత్త స్టీఫెన్ హాకింగ్. ఏలియన్స్ మనకు ఎప్పటికైనా కాంటాక్ట్‌లోకి వచ్చే అవకాశం ఉందని ఆయన అభిప్రాయపడ్డారు. కానీ వారి సిగ్నళ్లకు స్పందిస్తే తీవ్ర పరిణామాలు ఉంటాయని హెచ్చరించారు.

ఆధునిక నాగరికతకు..

మన కంటే ఆధునిక నాగరికతకు చెందిన వారి పిలుపునకు స్పందిస్తే.. మంచి కంటే చెడే ఎక్కువ జరుగుతుందని ఆయన అభిప్రాయపడ్డారు. ఇందుకు ఉదాహరణగా.. క్రిస్టోఫర్ కొలంబస్ అమెరికాను కనిపెట్టిన ఉదంతాన్ని ప్రస్తావించారు. స్థానిక అమెరికన్లతో కూడిన అద్భుత అమెరికా నాగరికతను కొలంబస్ ఆ దేశాన్ని కనిపెట్టాక, అక్కడి వెళ్లిన విదేశీయులు నాశనం చేసిన విషయాన్ని ఆయన గుర్తుకు తెచ్చారు.

మనల్ని బ్యాక్టీరియాలాగానే..

ఏలియన్స్ మనల్ని బ్యాక్టీరియాలాగానే చూస్తారని, మనకు గుర్తింపు ఇవ్వరని ఆయన అభిప్రాయపడ్డారు. ఈ విషయాలను ‘స్టీఫెన్ హాకింగ్స్ ఫేవరేట్ ప్లేసెస్' అనే డాక్యుమెంటరీలో పొందుపరిచారు. ఏలియన్స్ విషయంలో మానవాళిని హాకింగ్స్ గతంలోనూ హెచ్చరించారు.

వంద కోట్ల సంవత్సరాలు ముందున్న నాగరికత ..

మన కంటే వంద కోట్ల సంవత్సరాలు ముందున్న నాగరికత ఏదైనా మన సందేశాలను చదివే అవకాశం ఉందని ఆయన గతేడాది చెప్పుకొచ్చారు. విశ్వంలో మ‌నం ఒంట‌రివాళ్లం కాద‌ని, ఎక్క‌డో ఓ చోట జీవం ఉంద‌న్న న‌మ్మ‌కం త‌న‌కు మ‌రింత ఎక్కువైందని ఆయ‌న చెప్పారు. ఏలియ‌న్స్ గురించి హాకింగ్ ప్ర‌మాద హెచ్చ‌రిక‌లు జారీ చేయ‌డం ఇదే తొలిసారి కాదు.

కొందరు పరిశోధకులు..

అయితే కొందరు పరిశోధకులు ఆయన భయాలను కొట్టిపారేస్తున్నారు. మనం 1900ల నుంచే రేడియో సిగ్నల్స్‌ను అంతరిక్షంలోకి పంపుతున్నామని, మన కంటే ఆధునిక నాగరికతకు చెందిన ఏలియన్స ఉంటే.. ఇప్పటికే మనకు సిగ్నల్స్ పంపేవారని వారు వాదిస్తున్నారు.

ప‌ది ల‌క్ష‌ల న‌క్ష‌త్రాల‌పై ..

గ‌త సంవత్సరం మ‌న‌కు స‌మీపంలోని ప‌ది ల‌క్ష‌ల న‌క్ష‌త్రాల‌పై జీవం అన్వేష‌ణ కోసం ఉద్దేశించిన‌ బ్రేక్‌థ్రూ లిసెన్ ప్రాజెక్ట్ ఆవిష్క‌ర‌ణ సంద‌ర్భంగా కూడా హాకింగ్ ఇలాగే హెచ్చ‌రించారు. మ‌న సందేశాల‌ను స్వీక‌రించే గ్ర‌హాంత‌ర‌వాసులు మ‌న‌కంటే కొన్ని వంద‌ల కోట్ల ఏళ్ల ముందే ఉండొచ్చ‌ని ఆయ‌న అన్నారు.

అన్వేష‌ణ

ఏలియ‌న్స్ (గ్ర‌హాంత‌ర‌వాసులు) కోసం అన్వేష‌ణ మొద‌లైంది. నైరుతి చైనాలోని ప్ర‌పంచంలోనే అతిపెద్ద రేడియో టెలిస్కోప్ ఈ పనులు ప్రారంభించింది. 

రూ.1200 కోట్ల ఖ‌ర్చుతో..

30 ఫుట్‌బాల్ మైదానాలంత‌ వైశాల్యంలో ఉన్న అపెర్చ‌ర్ స్పెరిక‌ల్ రేడియో టెలిస్కోప్ (ఎఫ్ఎఎస్‌టీ)ను గిజౌలోని కొండ ప్రాంతంలో ఏర్పాటుచేశారు. రూ.1200 కోట్ల ఖ‌ర్చుతో ఏర్పాటైన ఈ టెలిస్కోప్ ఏలియన్స్ జాడను కనిపెట్టనుంది.