ఇంత తక్కువ ధరకా?స్నాప్‌డ్రాగన్‌తో Xiaomi Pad 7 లాంచ్.. ఫీచర్లు మాత్రం టాప్ క్లాస్..

ఎప్పుడెప్పుడా అని ఎదురుచూస్తున్న షియోమీ ప్యాడ్ 7 ఎట్టకేలకు భారత మార్కెట్లో లాంచ్ అయ్యింది. జనవరి 10న ఈ కొత్త టాబ్లెట్‌ను షియోమీ విడుదల చేసింది. గతంలో వచ్చిన షియోమీ ప్యాడ్ 6కి ఇది కొనసాగింపుగా వస్తోంది.

ప్రీమియం ఫీచర్లు, ఆకట్టుకునే యాక్సెసరీలు, లేటెస్ట్ టెక్నాలజీతో ఈ టాబ్లెట్ వినియోగదారులకు సరికొత్త అనుభూతిని ఇవ్వడానికి సిద్ధమైంది. ఈ షియోమీ ప్యాడ్ 7లో ఉన్న ప్రత్యేకతలు ఏంటి? ధర ఎంత? ఎప్పుడు అందుబాటులోకి వస్తుంది? ఇలాంటి ముఖ్యమైన విషయాలన్నీ ఇప్పుడు తెలుసుకుందాం.

* ఫీచర్లు

షియోమీ ప్యాడ్ 7 చూడటానికి చాలా స్టైలిష్‌గా ఉంటుంది. ఇందులో 11.2 అంగుళాల LCD డిస్‌ప్లేను 3:2 యాస్పెక్ట్ రేషియోతో ఇచ్చారు. ఈ డిస్‌ప్లే 3.2K రిజల్యూషన్‌తో వస్తుంది. అంటే విజువల్స్ చాలా స్పష్టంగా, షార్ప్‌గా ఉంటాయన్నమాట. ఇది గరిష్టంగా 800 నిట్స్ బ్రైట్‌నెస్‌తో వస్తుంది.

144Hz రిఫ్రెష్ రేట్ ఉండటం వల్ల స్క్రోలింగ్, గేమింగ్ వంటివి చాలా స్మూత్‌గా ఉంటాయి. అంతేకాదు, డాల్బీ విజన్, HDR10 సపోర్ట్ కూడా ఉండటంతో వీడియోలు చూసేటప్పుడు కళ్లకు విందులా అనిపిస్తుంది. కలర్స్ చాలా సహజంగా, స్పష్టంగా కనిపిస్తాయి.

* పెర్ఫార్మెన్స్

షియోమీ ప్యాడ్ 7లో పవర్‌ఫుల్ క్వాల్‌కామ్ స్నాప్‌డ్రాగన్ 7+ Gen 3 ప్రాసెసర్‌ను ఉపయోగించారు. దీనివల్ల యాప్స్ ఓపెన్ చేయడం, మల్టీటాస్కింగ్ చేయడం చాలా వేగంగా జరుగుతుంది. 12GB వరకు LPDDR5x RAM ఉండటం వల్ల ఒకేసారి చాలా యాప్స్‌ను వాడుతున్నా టాబ్లెట్ స్లో అవ్వకుండా ఉంటుంది.

* స్టోరేజ్

256GB వరకు UFS 4.0 స్టోరేజ్‌తో వస్తోంది. అంటే డేటా ట్రాన్స్‌ఫర్ స్పీడ్స్ చాలా ఫాస్ట్‌గా ఉంటాయి. ఆపరేటింగ్ సిస్టమ్ విషయానికొస్తే, ఇది ఆండ్రాయిడ్ 15 ఆధారిత HyperOS 2.0తో పనిచేస్తుంది. యూజర్ ఫ్రెండ్లీగా ఉండటంతో పాటు చాలా ఎక్స్‌ట్రా ఫీచర్లను అందిస్తుంది.

ఫొటోలు, వీడియో కాల్స్ కోసం ఇందులో 13MP రియర్ కెమెరా, సెల్ఫీలు, వీడియో కాల్స్ కోసం 8MP ఫ్రంట్ అల్ట్రావైడ్ కెమెరాను ఇచ్చారు.

ఆడియో విషయానికొస్తే, డాల్బీ అట్మాస్ సపోర్ట్‌తో కూడిన క్వాడ్ స్పీకర్లను అమర్చారు. దీనివల్ల సౌండ్ క్వాలిటీ చాలా బాగుంటుంది. సినిమా చూస్తున్నా, గేమ్ ఆడుతున్నా సరౌండ్ సౌండ్ ఎఫెక్ట్‌తో మంచి అనుభూతిని పొందవచ్చు.

షియోమీ ప్యాడ్ 7లో 8,850mAh భారీ బ్యాటరీని ఇచ్చారు. ఇది రోజంతా నిరంతరాయంగా పనిచేసేందుకు సరిపోతుంది. అంతేకాకుండా, 45W ఫాస్ట్ ఛార్జింగ్‌కు సపోర్ట్ చేస్తుంది. బాక్స్ లో ఛార్జర్ కూడా ఇస్తున్నారు. కనెక్టివిటీ ఆప్షన్ల విషయానికొస్తే, Wi-Fi 6E, బ్లూటూత్ 5.4, USB 3.2 టైప్-C Gen 1 పోర్ట్ వంటివి ఉన్నాయి.

* యాక్సెసరీస్..

షియోమీ ప్యాడ్ 7తో పాటు కొన్ని అద్భుతమైన యాక్సెసరీలను కూడా Xiaomi విడుదల చేసింది. వాటి గురించి ఇప్పుడు తెలుసుకుందాం.

షియోమీ ప్యాడ్ 7 కీబోర్డ్: దీని ధర రూ.4,999. ఈ కీబోర్డ్‌ను టాబ్లెట్‌కు కనెక్ట్ చేసుకుని ల్యాప్‌టాప్‌లా ఉపయోగించుకోవచ్చు. టైపింగ్ చేసేవాళ్లకు ఇది చాలా ఉపయోగకరంగా ఉంటుంది.

ఫోకస్ కీబోర్డ్ కేస్: దీని ధర రూ.8,999. ఇది బ్యాక్‌లిట్ కీబోర్డ్‌తో వస్తుంది. అంటే చీకటిలో కూడా కీబోర్డ్ వెలుగుతూ ఉంటుంది. అంతేకాదు, ఇందులో ట్రాక్‌ప్యాడ్ కూడా ఉంటుంది. దీనివల్ల ల్యాప్‌టాప్ లాంటి పూర్తి అనుభూతిని పొందవచ్చు.

షియోమీ ప్యాడ్ 7 పెన్: దీని ధర రూ.5,999. ఇది చాలా తక్కువ లేటెన్సీతో వస్తుంది. అంటే రాస్తున్నప్పుడు, గీస్తున్నప్పుడు వెంటనే రెస్పాండ్ అవుతుంది. ఇందులో అదనంగా బటన్లు కూడా ఉన్నాయి. ఇది క్రియేటివ్ పనులు చేసేవారికి బాగా ఉపయోగపడుతుంది.

మాగ్నెటిక్ డబుల్ సైడెడ్ కవర్: దీని ధర రూ.1,499. ఇది ఫోల్డింగ్ డిజైన్‌తో వస్తుంది. దీన్ని క్లోజ్ చేస్తే టాబ్లెట్ స్లీప్ మోడ్‌లోకి వెళ్తుంది. ఓపెన్ చేస్తే వెంటనే వేకప్ అవుతుంది. ఇది టాబ్లెట్‌కు రక్షణ ఇవ్వడంతో పాటు స్టాండ్‌లా కూడా పనిచేస్తుంది.

* ధర ఎంత, ఎక్కడ లభిస్తుంది

షియోమీ Pad 7 మూడు వేరియంట్లలో లభిస్తుంది.

• 8GB RAM + 128GB స్టోరేజ్: రూ.27,999
• 12GB RAM + 256GB స్టోరేజ్: రూ.30,999
• 12GB RAM + 256GB స్టోరేజ్ (నానో టెక్చర్ డిస్‌ప్లేతో): రూ.32,999

బ్యాంక్ ఆఫర్ల ద్వారా అన్ని మోడళ్లపై రూ.1,000 తగ్గింపు లభిస్తుంది. ఈ టాబ్లెట్ జనవరి 13 నుంచి అమెజాన్, షియోమీ ఇండియా వెబ్‌సైట్, అన్ని ఆఫ్ లైన్ స్టోర్లలో అమ్మకానికి ఉంటుంది.

ఈ టాబ్లెట్ గ్రాఫైట్ గ్రే, సేజ్ గ్రీన్, మిరాజ్ పర్పుల్ రంగుల్లో లభిస్తుంది.