గేమింగ్ ప్రియులకు కిక్కిచ్చే న్యూస్.. హ్యాండ్‌హెల్డ్ Xbox కన్సోల్‌ను తయారు చేస్తోన్న ASUS కంపెనీ..

Handheld Xbox Console: చాలా సంవత్సరాలుగా ఎక్స్‌బాక్స్ (Xbox) ఫ్యాన్స్ మైక్రోసాఫ్ట్ నుంచి ఒక పోర్టబుల్ గేమింగ్ డివైజ్ కోసం ఎదురు చూస్తున్నారు. వారందరి నిరీక్షణకు తెరపడనుంది. ఇంతకుముందే మైక్రోసాఫ్ట్ గేమింగ్ CEO ఫిల్ స్పెన్సర్ స్వయంగా అలాంటి ఒక డివైజ్ తయారీలో ఉందని కన్ఫర్మ్ చేశారు. ఇప్పుడు, ఆ హ్యాండ్‌హెల్డ్ ఎక్స్‌బాక్స్ గురించిన మరిన్ని వివరాలు బయటకు వచ్చాయి.

ఈ కొత్త కన్సోల్‌ను అసూస్ కంపెనీ తయారు చేయబోతోంది, దీనికి ప్రాజెక్ట్ కెన్నన్ అని పేరు పెట్టారు. మైక్రోసాఫ్ట్ ఈ కొత్త డివైజ్‌తో కన్సోల్ గేమింగ్‌ను, PC గేమింగ్‌ను ఒకే పోర్టబుల్ డివైజ్‌లో తీసుకురావాలని చూస్తోంది. సాధారణ Xbox కన్సోల్‌ల వలె కాకుండా, ఇది విండోస్ ఆపరేటింగ్ సిస్టమ్‌పై రన్ అవుతుంది.

కానీ, Xbox యూజర్లకు సులువుగా ఉండేలా ప్రత్యేకమైన ఇంటర్‌ఫేస్‌తో వస్తుంది. విండోస్, Xboxలను ఒకే దగ్గరకు చేర్చాలనే మైక్రోసాఫ్ట్ ప్లాన్‌లో ఇది ఒక భాగం. భవిష్యత్తులో మరిన్ని హార్డ్‌వేర్ కంపెనీలతో కలిసి Xbox ఎకోసిస్టమ్‌ను మరింత విస్తరించాలని మైక్రోసాఫ్ట్ భావిస్తోంది.

* అసూస్, మైక్రోసాఫ్ట్

గేమింగ్ హార్డ్‌వేర్‌లో అసూస్ ఒక పెద్ద పేరు. ఈ కంపెనీనే ప్రాజెక్ట్ కెన్నన్ తయారీ బాధ్యత తీసుకుంది. మైక్రోసాఫ్ట్ క్వాలిటీ డిజైన్‌కు, పర్ఫార్మెన్స్‌కు చాలా ప్రాముఖ్యత ఇస్తున్నట్లు ఈ కలయిక చూస్తేనే అర్థమవుతుంది. టాప్ హార్డ్‌వేర్ తయారీదారులతో కలిసి, బెస్ట్ హ్యాండ్‌హెల్డ్ గేమింగ్ ఎక్స్‌పీరియన్స్‌ను అందించాలని వాళ్లు లక్ష్యంగా పెట్టుకున్నారు.

* హార్డ్‌వేర్, ధర వివరాలు

ప్రాజెక్ట్ కెన్నన్‌లో AMD రైజెన్ Z2 గో చిప్ వాడతారని తెలుస్తోంది. దీని ధర దాదాపు 499 డాలర్ల నుంచి 599 డాలర్ల (రూ.52 వేలు) మధ్య ఉండొచ్చని అంచనా. ఈ ఏడాది చివరిలో ఇది లాంచ్ అవ్వొచ్చని అంటున్నారు కానీ ఇంకా డెవలప్‌మెంట్ స్టేజ్‌లోనే ఉంది కాబట్టి రిలీజ్ డేట్ మారవచ్చు.

ఇది హ్యాండ్‌హెల్డ్ గేమింగ్‌కు మంచి పర్ఫార్మెన్స్ ఇస్తుందని భావిస్తున్నారు. ఎందుకంటే ఇది Xbox బ్రాండ్ పేరుతో వస్తుంది, దీని అర్థం క్వాలిటీ, పెర్ఫార్మెన్స్ విషయంలో రాజీ ఉండదు. Xbox గేమ్ లైబ్రరీ మొత్తం చేతిలో పట్టే పరికరంలోకి వస్తుంది, అంటే మీకు ఇష్టమైన గేమ్స్‌ను ఎక్కడైనా, ఎప్పుడైనా ఆడుకోవచ్చు.

దీని కంట్రోల్స్ Xbox కంట్రోలర్స్‌లాగే సౌకర్యవంతంగా ఉంటాయి, గేమింగ్ చాలా సులువుగా, ఆనందదాయకంగా ఉంటుంది. చివరగా, ఇది మైక్రోసాఫ్ట్ ఉత్పత్తి కాబట్టి, సాఫ్ట్‌వేర్, హార్డ్‌వేర్ ఆప్టిమైజేషన్ అద్భుతంగా ఉంటుంది, ఇది గేమింగ్ అనుభవాన్ని మరింత మెరుగుపరుస్తుంది. మరి ఈ ఊహగానాలకు తగ్గట్టు ఈ పరికరం అద్భుతంగా ఉంటుందో లేదో చూడాలి.

* Xbox హ్యాండ్‌హెల్డ్ గేమింగ్ భవిష్యత్తు

మైక్రోసాఫ్ట్ హ్యాండ్‌హెల్డ్ గేమింగ్‌లోకి అడుగుపెట్టడం ఎక్స్‌బాక్స్ (Xbox) చరిత్రలో ఒక కొత్త శకానికి నాంది పలుకుతోంది. పవర్‌ఫుల్ హార్డ్‌వేర్‌తో, గేమింగ్ రంగంలో తమకున్న అనుభవంతో, గేమ్స్‌ను ఆడుకునే విధానాన్నే మార్చేయాలని చూస్తున్నారు. ప్రాజెక్ట్ కెన్నన్ ఫైనల్ ఫీచర్లు, లాంచ్ డేట్ గురించిన మరిన్ని వివరాల కోసం Xbox ఫ్యాన్స్ చాలా ఆసక్తిగా ఎదురుచూస్తున్నారు.