టెక్నాలజీలో ఓ అద్భుతం నాయిస్ క్యాన్సిలేషన్ ఇయర్‌బడ్స్.. ఇంతకీ అవి ఎలా పనిచేస్తాయో తెలుసా?

Noise Cancelling Earbuds Work: ప్రయాణాలు చేసేవాళ్లకు ప్రశాంతంగా ఉండాలంటే ఇప్పుడు నాయిస్ క్యాన్సిలేషన్ ఇయర్‌బడ్స్ (Noise Cancellation Earbuds) ఓ తప్పనిసరి వస్తువుగా మారిపోయాయి. విమానంలో ఉన్నా, రైలులో వెళ్తున్నా, బస్సులో కూర్చున్నా.. చుట్టూ ఉండే గోలంతా పక్కకు నెట్టి, ఇష్టమైన పాటలు, పాడ్‌కాస్ట్‌లు లేదా ఆడియో బుక్స్ ఎలాంటి ఆటంకం లేకుండా ఆస్వాదించవచ్చు. అసలు ఇవి ఎలా పనిచేస్తాయో ఇప్పుడు చూద్దాం.

* నాయిస్ క్యాన్సిలేషన్ అంటే..

నాయిస్ క్యాన్సిలేషన్ అంటే మనకు అక్కర్లేని చుట్టుపక్కల శబ్దాలను (Background Sound) తగ్గించే లేదా పూర్తిగా ఆపేసే ఒక టెక్నాలజీ. ఇది ఎలా పనిచేస్తుందంటే, బయటి నుంచి వచ్చే శబ్ద తరంగాలకు (Sound Waves) వ్యతిరేకమైన తరంగాలను సృష్టించడం ద్వారా వాటి ప్రభావాన్ని రద్దు చేస్తుంది.

దీనివల్ల మన చుట్టూ ఉన్న వాతావరణం చాలా నిశ్శబ్దంగా అనిపిస్తుంది, మనం వినాలనుకుంటున్న ఆడియోపై పూర్తిగా దృష్టి పెట్టొచ్చు. ఈ టెక్నాలజీని ఎక్కువగా హెడ్‌ఫోన్స్, ఇయర్‌బడ్స్‌లోనే వాడుతుంటారు. ఉదాహరణకు, మీరు మంచి రద్దీగా ఉన్న రోడ్డు పక్కన నడుస్తూ పాటలు వింటున్నారనుకోండి.

మీ ఇయర్‌బడ్స్‌లో ఉండే మైక్రోఫోన్లు ఆ ట్రాఫిక్ గోలను వింటాయి. వెంటనే, ఆ శబ్దానికి వ్యతిరేకమైన (తలకిందులైన) తరంగాలను ఇయర్‌బడ్స్ సృష్టిస్తాయి. ఈ రెండు తరంగాలు ఒకదానికొకటి ఢీకొని, బయటి శబ్దం రద్దయిపోతుంది. అప్పుడు మీకు కేవలం పాట మాత్రమే చాలా స్పష్టంగా వినిపిస్తుందన్నమాట.

* నాయిస్ క్యాన్సిలేషన్ పనిచేసే విధానం ఇదే!

ఇది ఎలా పనిచేస్తుందో పూర్తిగా అర్థం కావాలంటే, ముందు శబ్ద తరంగాలు ఎలా ఉంటాయో కొంచెం తెలుసుకోవాలి. శబ్దం అనేది గాలిలో తరంగాల రూపంలో ప్రయాణిస్తుంది. అంటే, గాలి పీడనంలో (Air Pressure) చాలా వేగంగా చిన్న చిన్న మార్పులు వస్తాయి. మన చెవులు ఈ మార్పులను పసిగట్టి, వాటిని శబ్దంగా గుర్తిస్తాయి.

నాయిస్ క్యాన్సిలింగ్ ఇయర్‌బడ్స్ 'యాక్టివ్ నాయిస్ క్యాన్సిలేషన్’ (ANC) టెక్నాలజీని ఉపయోగిస్తాయి. వీటిలో చాలా చిన్న మైక్రోఫోన్లు ఉంటాయి, అవి చుట్టుపక్కల ఉన్న శబ్దాలను నిరంతరం వింటూనే ఉంటాయి. ఆ తర్వాత, ఇయర్‌బడ్స్‌లో ఉండే 'డిజిటల్ సిగ్నల్ ప్రాసెసర్’ (Digital Signal Processor) అనే చిప్, బయటి నుంచి వస్తున్న శబ్ద తరంగాలను విశ్లేషిస్తుంది.

వాటికి సరిగ్గా అంతే తీవ్రత (Amplitude) ఉండి, పూర్తిగా వ్యతిరేక దశలో (Phase - అంటే 180 డిగ్రీలు వేరుగా) ఉండే కొత్త శబ్ద తరంగాలను సృష్టిస్తుంది. ఈ రెండు తరంగాలు (బయటి శబ్దం, ఇయర్‌బడ్స్ సృష్టించిన వ్యతిరేక శబ్దం) కలిసినప్పుడు, అవి ఒకదానినొకటి రద్దు చేసుకుంటాయి.

ఫలితంగా మనకు నిశ్శబ్దం లేదా చాలా వరకు తగ్గిన బయటి శబ్దం మాత్రమే వినిపిస్తుంది. ఈ నాయిస్ క్యాన్సిలేషన్ టెక్నాలజీ ముఖ్యంగా విమానం లేదా రైలు ఇంజన్ల శబ్దం, ఏసీల హోరు, లేదా పక్కన నిరంతరాయంగా వినిపించే జనాల మాటల వంటి తక్కువ నుంచి మధ్యస్థాయి ఫ్రీక్వెన్సీ శబ్దాలను తగ్గించడంలో చాలా అద్భుతంగా పనిచేస్తుంది.

అయితే, పక్కన ఎవరైనా గట్టిగా అరవడం, పిల్లాడి ఏడుపు లాంటి అకస్మాత్తుగా వచ్చే ఎక్కువ ఫ్రీక్వెన్సీ (High-pitched) శబ్దాలను మాత్రం అంత సమర్థవంతంగా ఆపలేకపోవచ్చు. ఈ నాయిస్ క్యాన్సిలేషన్‌లో కొన్ని రకాలున్నాయి. హెడ్‌ఫోన్స్‌లో ప్రధానంగా మూడు రకాల నాయిస్ క్యాన్సిలేషన్ టెక్నాలజీలు ఉంటాయి.

* రకాలు

- యాక్టివ్ నాయిస్ క్యాన్సిలేషన్ (ANC): మనం ఇప్పటిదాకా చెప్పుకున్నదే ఇది. బయటి శబ్దాలను వినడానికి మైక్రోఫోన్లు, వాటిని రద్దు చేయడానికి స్పీకర్లు, ప్రాసెసింగ్ చిప్ వాడే టెక్నాలజీ. ఓవర్-ఇయర్ హెడ్‌ఫోన్స్ (చెవిని పూర్తిగా కప్పే పెద్ద హెడ్‌ఫోన్స్), ఇన్-ఇయర్ ఇయర్‌బడ్స్ (చెవిలోపల పెట్టుకునే చిన్నవి)లో దీన్ని ఎక్కువగా ఉపయోగిస్తారు.

- పాసివ్ నాయిస్ క్యాన్సిలేషన్: దీనికి ప్రత్యేకమైన టెక్నాలజీ ఏమీ అవసరం లేదు. హెడ్‌ఫోన్ లేదా ఇయర్‌బడ్స్ డిజైన్ మీదే ఇది ఆధారపడి ఉంటుంది. చెవికి బాగా బిగుతుగా సరిపోయేలా (snug fit) డిజైన్ చేయడం, మెత్తటి కుషన్లు వాడటంతో బయటి శబ్దం లోపలికి రాకుండా సహజంగానే ఆగిపోతుంది. దీన్నే 'నాయిస్ ఐసోలేషన్' అని కూడా అంటారు.

- అడాప్టివ్ నాయిస్ క్యాన్సిలేషన్: ఇది ANC టెక్నాలజీకి ఒక అప్‌గ్రేడ్ వెర్షన్ లాంటిది. ఇది మీ చుట్టూ ఉన్న వాతావరణాన్ని బట్టి, ఎంత శబ్దం ఉందో గమనించి, దానికి అనుగుణంగా నాయిస్ క్యాన్సిలేషన్ స్థాయిని ఆటోమేటిక్‌గా సర్దుబాటు చేస్తుంది. అంటే, నిశ్శబ్దంగా ఉన్నచోట తక్కువగా, గోల ఎక్కువగా ఉన్నచోట ఎక్కువగా క్యాన్సిలేషన్ పనిచేస్తుందన్నమాట.

* నాయిస్ క్యాన్సిలింగ్ హెడ్‌ఫోన్స్ వాడితే లాభాలేంటి..

ఈ నాయిస్ క్యాన్సిలింగ్ ఇయర్‌బడ్స్ వల్ల మనకు చాలా ఉపయోగాలున్నాయి. ప్రశాంతమైన ప్రయాణం వీటితో మీ సొంతమవుతుంది. ఎందుకంటే ఇవి విమానం, రైలు, బస్సు ప్రయాణాల్లో బయటి శబ్దాన్ని బాగా తగ్గించి, అలసట లేకుండా హాయిగా ప్రయాణించేలా చేస్తాయి.

చాలా గొప్ప ఆడియో అనుభూతి కూడా మీకు లభిస్తుంది. చుట్టూ గోల లేనప్పుడు, మీరు వినే పాటలు లేదా మాటలు మరింత స్పష్టంగా, ప్రతి చిన్న శబ్దం కూడా వివరంగా వినిపిస్తాయి. ఆఫీసులో, లైబ్రరీలో లేదా ఇంట్లో గోల ఎక్కువగా ఉన్నప్పుడు కూడా, వీటిని పెట్టుకుంటే మీ పని మీద లేదా చదువు మీద బాగా దృష్టి పెట్టొచ్చు.

చెవులకు రక్షణ కూడా ఉంటుంది. బయటి శబ్దం ఎలాగూ తగ్గుతుంది కాబట్టి, పాటలు గట్టిగా (ఎక్కువ వాల్యూమ్‌లో) పెట్టుకోవాల్సిన అవసరం ఉండదు. దీనివల్ల ఎక్కువ సౌండ్ వల్ల చెవులు దెబ్బతినే ప్రమాదం కూడా తగ్గుతుంది. ఈ టెక్నాలజీ లేని ఇయర్ బర్డ్స్ వాడితే చెవులు పాడయ్యే ప్రమాదం ఎక్కువ.

అందుకే కాస్త డబ్బులు ఎక్కువైనా సరే నాయిస్ క్యాన్సిలేషన్ ఇయర్‌బడ్స్ కొనుగోలు చేయడమే ఉత్తమం. సౌండ్ క్వాలిటీ పరంగానే సంతృప్తి కలగడమే కాకుండా ఆరోగ్యంగా కూడా ఉండొచ్చు. మొత్తం మీద ఇవి మన ప్రయాణాలనే కాదు, రోజువారీ జీవితాన్ని కూడా ఎంత ప్రశాంతంగా మార్చేస్తాయో తెలుసుకున్నారు కదా. ఈ వార్త మీకు నచ్చితే మీ ఫ్రెండ్స్, ఫ్యామిలీ మెంబర్స్ కు తప్పకుండా షేర్ చేయండి.