67W ఫాస్ట్ ఛార్జింగ్, 6000mAh బ్యాటరీ, 50MP లైకా కెమెరా.. షియోమీ సీవీ 5 ప్రో త్వరలో.. అదిరిపోయే ఫీచర్లు లీక్!

Xiaomi Civi 5 Pro features : షియోమీ నుంచి త్వరలో సీవీ 5 ప్రో ( Xiaomi Civi 5 Pro ) అనే కొత్త ఫోన్ రాబోతోంది. దీనికి సంబంధించిన కొన్ని ఫీచర్లు ఇప్పుడే లీక్ అయ్యాయి. షియోమీ ఇంకా అధికారికంగా విడుదల తేదీ చెప్పకపోయినా, చైనా 3C సర్టిఫికేషన్ డేటాబేస్‌లో ఈ ఫోన్ కనిపించింది. దీని మోడల్ నంబర్ 25067PYE3C అని తెలిసింది.

ఈ లిస్టింగ్ ద్వారా ఫోన్‌ లో 67W ఫాస్ట్ ఛార్జింగ్ సపోర్ట్ ఉంటుందని ఖాయమైంది. అయితే, ఈ సర్టిఫికేషన్‌లో ఇతర వివరాలు (స్పెసిఫికేషన్లు) ఏవీ బయటకు రాలేదు. టెక్ ఇండస్ట్రీ వర్గాల ప్రకారం దీని ముఖ్యమైన స్పెసిఫికేషన్లు, ఫీచర్లు తెలుసుకుందాం. ఇవి కేవలం అంచనా వేసిన ఫీచర్లు మాత్రమే. ఆ విషయాన్ని గుర్తు పెట్టుకోవాలి.

* ఫీచర్లు
ప్రముఖ లీక్‌స్టర్ డిజిటల్ చాట్ స్టేషన్ స్నాప్‌డ్రాగన్ 8s జెన్ 4 (Snapdragon 8s Gen 4) ప్రాసెసర్ ఉండవచ్చు. త్వరలో రాబోయే ఈ క్వాల్‌కామ్ చిప్‌సెట్‌ లో ఒకే కార్టెక్స్-X4 ప్రైమ్ కోర్, అడ్రినో 825 (Adreno 825) GPU ఉండే అవకాశం ఉంది.

ఇంకా, ఈ ఫోన్ కేవలం 7mm మందంతో చాలా స్లిమ్‌గా ఉంటుందని, భారీ 6000mAh బ్యాటరీతో వస్తుందని అంటున్నారు. సీవీ 4 ప్రోలోని 4700mAh బ్యాటరీతో పోలిస్తే ఇది చాలా పెద్ద అప్‌గ్రేడ్. బ్యాటరీ సామర్థ్యం పెరిగితే చాలామంది దీన్ని కొనుగోలు చేయడానికి కచ్చితంగా మొగ్గు చూపిస్తారు.

* డిస్‌ప్లే, కెమెరా అప్‌గ్రేడ్స్ అదుర్స్
షియోమీ సీవీ 5 ప్రో క్వాడ్-కర్వ్డ్ డిస్‌ప్లేతో, అదీ 1.5K రిజల్యూషన్‌తో వస్తుందని అంచనా. ఈ స్క్రీన్ చూసేవారికి ఒక ప్రీమియం అనుభూతిని అందిస్తుందట. కెమెరా విషయానికొస్తే, షియోమీ ఈసారి లైకా (Leica) ట్యూన్ చేసిన సెన్సార్లను వాడవచ్చు. ముఖ్యంగా, 3x ఆప్టికల్ జూమ్‌తో కూడిన 50MP పెరిస్కోప్ టెలిఫోటో లెన్స్ ఉండొచ్చని టాక్.

* ఎప్పుడు లాంచ్ అవుతుంది?
షియోమీ ఇంకా అధికారికంగా లాంచ్ తేదీని ప్రకటించకపోయినా, వచ్చే ఏడాది (2025) ఏప్రిల్‌లో క్వాల్‌కామ్ స్నాప్‌డ్రాగన్ 8s జెన్ 4 ప్రాసెసర్‌ను విడుదల చేసిన తర్వాత ఈ ఫోన్ మార్కెట్లోకి రావచ్చని టెక్ నిపుణులు అంచనా వేస్తున్నారు. గతేడాది మార్చిలో సీవీ 4 ప్రో లాంచ్ అయింది.

దాని తర్వాతి మోడల్ కోసం టెక్ ప్రియులు ఇప్పటికే ఆసక్తిగా ఎదురుచూస్తున్నారు. షియోమీ సీవీ 5 ప్రో కేవలం చైనా మార్కెట్‌కే పరిమితం కాకపోవచ్చు. దీన్ని గ్లోబల్ మార్కెట్లలో వేరే పేరుతో, బహుశా షియోమీ 15 సివి (Xiaomi 15 Civi) గా లాంచ్ చేయవచ్చని వార్తలు వస్తున్నాయి. IMEI డేటాబేస్ ఈ విషయాన్ని బలపరుస్తోంది.

చైనా కోసం 25067PYE3C, ఇండియా కోసం 25067PYE3I అనే రెండు మోడల్ నంబర్లు కనిపించాయి. దీన్ని బట్టి, అంతర్జాతీయ మార్కెట్ల కోసం ఫోన్‌ను రీబ్రాండ్ చేసే అవకాశం ఉందని స్పష్టమవుతోంది.