జియోతో చేతులు కలిపిన బిఎస్ఎన్ఎల్, ఐడియా, వొడాఫోన్,

#1

నిన్నటిదాకా ఢీ అంటే ఢీ అన్న టెలికం కంపెనీలు ఇప్పుడు అదనపు వ్యయ భారం లేకుండా ఇచ్చి పుచ్చుకునే విధానంలో తమ కవరేజీ సేవలు మెరుగుపరచుకోవడంపై దృష్టి పెట్టాయి. ఇందులో భాగంగా నెట్‌వర్క్ షేరింగ్ కోసం అన్ని కంపెనీలు చేతులు కలుపుతున్నాయి.

#2

ఇప్పటికే వొడాఫోన్, ప్రభుత్వ రంగ సంస్థ బీఎస్‌ఎన్‌ఎల్‌తో టై అప్ అయిన మరుసటి రోజే రిలయన్స్ జియో సైతం బీఎస్‌ఎన్‌ఎల్‌తో నెట్‌వర్క్ షేరింగ్ ఒప్పందం చేసుకుంది.

#3

2జీ, 4జీ సేవలకు సంబంధించి దేశవ్యాప్తంగా ఇంట్రా సర్కిల్ రోమింగ్ ఒప్పందాన్ని జియో, బీఎస్‌ఎన్‌ఎల్ కుదుర్చుకున్నట్టుగా ప్రకటించాయి. ఈ కలయికతో ఇరు కంపెనీల కస్టమర్లకు మరింత విస్తృత కవరేజీ అందుబాటులోకి రానుంది.

#4

ఈ ఒప్పందం ద్వారా రిలయన్స్ జియో సేవలు బీఎస్‌ఎన్‌ఎల్ కస్టమర్లకు అందుబాటులోకి రానుండగా... జియో కస్టమర్లు బీఎస్‌ఎన్‌ఎల్ నెట్‌వర్క్ పరిధిలో వాయిస్ కాల్స్ చేసుకునేందుకు వీలవుతుంది.

#5

సేవల విస్తరణ, నెట్‌వర్క్ సామర్థ్యాన్ని బలోపేతం చేయడం ద్వారా మా కస్టమర్లకు నాణ్యమైన సేవలు అందించడంపై దృష్టి పెట్టాం. ఈ ఒప్పందం వల్ల రెండు కంపెనీల వినియోగదారులకు మేలు కలుగుతుంది. నిరంతరాయ సేవలు అందించడానికి వీలవుతుందని బిఎస్ఎన్ఎల్ ఓ ప్రకటనలో తెలిపింది.

#6

దీంతో పాటు ఇప్పుడు మా నెట్‌వర్క్‌ను అప్‌గ్రేడ్ చేస్తున్నాం. ఇందుకు మూడు నెలలు పడుతుంది. ఆ తర్వాత బీఎస్‌ఎన్‌ఎల్ కస్టమర్లు 4జీ హ్యాండ్‌సెట్‌తో జియో సేవలు అందుకోవచ్చు. ధరలను త్వరలోనే ఖరారు చేస్తాం అని బీఎస్‌ఎన్‌ఎల్ చైర్మన్ అనుపమ్ శ్రీవాస్తవ చెప్పారు.

#6

తాజా డీల్‌తో జియో కస్టమర్లు బీఎస్‌ఎన్‌ఎల్ నెట్‌వర్క్‌పై 2జీ వాయిస్ కాల్స్ చేసుకోవడంతో పాటు రోమింగ్‌లో కవరేజీకి ఉపకరిస్తుంది' అని జియో ఎండీ సంజయ్ మష్రువాలా పేర్కొన్నారు.

#8

ఇప్పుడు ఐడియా సైతం జియోతో చేతులు కలిపింది. రిలయన్స్ జియో నెట్‌వర్క్ కోసం మరిన్ని పోర్ట్‌లను అందుబాటులోకి తెస్తామని ఐడియా తెలిపింది.

#9

దాదాపు 18.5 లక్షల కస్టమర్ల కాల్స్ ట్రాఫిక్‌ను సపోర్ట్ చేస్తాయని పేర్కొంది. అయితే, జియో నెట్‌వర్క్ నుంచి భారీ సంఖ్యలో వచ్చే కాల్స్‌తో తమకు నష్టం వాటిల్లనున్నట్టు తెలిపింది. అయినా సేవలు అందిస్తామని తెలిపింది. 

#10

ఇంటర్‌కనెక్ట్‌పై ట్రాయ్‌తో ఇటీవల టెల్కోల భేటీ తర్వాత ఐడియా తాజా నిర్ణయాన్ని ప్రకటించింది. అయితే దేశంలో ఇప్పటికే టాప్ లో ఉన్న ఎయిర్ టెల్ ఈ విషయంపై ఇంకా ఎటువంటి నిర్ణయాన్ని ప్రకటించలేదు.