శాంసంగ్ నుంచి సరికొత్త ఫోల్డబుల్ ఫోన్.. ఇక లోపలికే కాదు, బయటకీ మడతపెట్టొచ్చు!

Samsung Foldable Phone: శాంసంగ్ కంపెనీ ఒక అద్భుతమైన ఫోల్డబుల్ స్మార్ట్‌ఫోన్‌ను తయారుచేస్తోంది. దీని ప్రత్యేకత ఏంటంటే, ఇది లోపలికి, బయటకి అంటే రెండు వైపులా పూర్తిగా మడిచేలా (360-డిగ్రీల హింజ్) వస్తోంది. ఈ సరికొత్త డిజైన్‌కు అమెరికా పేటెంట్ మరియు ట్రేడ్‌మార్క్ ఆఫీస్ నుంచి అనుమతి కూడా లభించింది. ఇది ఫోల్డబుల్ ఫోన్ల మార్కెట్లో ఒక పెద్ద మార్పుకు సంకేతం.

ప్రస్తుతం ఉన్న ఫోల్డబుల్ ఫోన్లు (Foldable smartphones) కేవలం ఒక వైపు మాత్రమే మడతపడతాయి. కానీ ఈ కొత్త ఆవిష్కరణతో, వినియోగదారులకు ఫోన్‌ను ఎలా కావాలంటే అలా వాడుకునే వెసులుబాటు, అద్భుతమైన అనుభూతి లభిస్తుంది. మరి ఇప్పుడు దీని గురించిన విశేషాలేవో తెలుసుకుందామా..

OnePlus 13T వచ్చేస్తోంది.. 50MP డ్యూయల్ కెమెరా, 6200mAh బ్యాటరీ, 80W ఛార్జింగ్‌తో.. పూర్తి వివరాలు..
* 360-డిగ్రీల కీలు (హింజ్): ఇదే దీని స్పెషాలిటీ..

ప్రస్తుతం మార్కెట్లో ఉన్న చాలా ఫోల్డబుల్ ఫోన్లు కేవలం లోపలికి లేదా బయటకి, ఏదో ఒక వైపు మాత్రమే మడిచేలా వస్తున్నాయి. కొన్ని ఫోన్లలో ఎక్కువ మడతలు ఉన్నా, పూర్తిగా 360 డిగ్రీలు తిరిగే సౌలభ్యం లేదు. అయితే, ప్రముఖ టిప్‌స్టర్ @Xleaks7 షేర్ చేసిన ఒక పేటెంట్ ఇమేజ్ కొత్త విషయాన్ని తెలిపింది.

ఇందులో కనిపించిన దాని ప్రకారం శాంసంగ్ ఒక ప్రత్యేకమైన కీలు (Hinge) టెక్నాలజీని వాడుతోంది. దీనివల్ల ఫోన్‌ను రెండు వైపులా ఎలా మడిచినా దాని నాణ్యత తగ్గదు, పాడవకుండా దృఢంగా ఉంటుంది. అంటే, వినియోగదారులు ఫోన్‌ను అవసరాన్ని బట్టి ఇట్టే మార్చుకోవచ్చు, ఇది ఫోన్ వినియోగాన్ని మరింత సులభతరం చేస్తుంది.

* అల్ట్రా-థిన్ గ్లాస్‌తో పటిష్టమైన డిస్‌ప్లే..

ఇలా రెండు వైపులా మడతపడాలంటే డిస్‌ప్లే కూడా చాలా ప్రత్యేకంగా ఉండాలి. అందుకే శాంసంగ్, వంగే గుణం ఉన్న అత్యంత పలుచని గాజు (Ultra-Thin Glass - UTG) డిస్‌ప్లేను అభివృద్ధి చేస్తోంది. ఈ స్క్రీన్‌లో ఫ్లెక్సిబుల్ పాలిమర్లు, జిగురు వంటివి పొరలుగా అమర్చి ఉంటారు.

దీనివల్ల స్క్రీన్ మన్నికగా ఉండటమే కాకుండా, మడతపెట్టేటప్పుడు చాలా సున్నితమైన అనుభూతిని ఇస్తుంది. గరుకుగా ఎప్పుడు అనిపించదు. ఈ UTG టెక్నాలజీ ఫోన్‌కు మరింత గట్టిదనాన్ని ఇస్తుంది, ప్రస్తుతం ఉన్న ఫోల్డబుల్ ఫోన్ల కన్నా గీతలు, అరుగుదల నుంచి ఎక్కువ రక్షణ కల్పిస్తుంది.

* బయటి కవర్ స్క్రీన్ ఇక అవసరం లేదా?

ప్రస్తుతం ఉన్న ఫోల్డబుల్ ఫోన్లలో, ఫోన్ మూసి ఉన్నప్పుడు చిన్న చిన్న పనులు చేసుకోవడానికి, నోటిఫికేషన్లు చూడటానికి ఒక ప్రత్యేకమైన బయటి కవర్ డిస్‌ప్లే ఉంటుంది. కానీ, శాంసంగ్ కొత్త డిజైన్‌లో దీని అవసరం ఉండకపోవచ్చు. ఎందుకంటే, లోపల ఉన్న ప్రధాన డిస్‌ప్లేనే ఏ వైపు మడిచినా దానికి అనుగుణంగా మారుతుంది.

అలా ఒకే స్క్రీన్‌తో అన్ని పనులు చక్కబెట్టేలా (ఆల్-ఇన్-వన్) రూపొందిస్తున్నారు. దీనికి అదనంగా, ఫోన్ వెనుక భాగంలో, కెమెరాల కింద ఒక చిన్న డిస్‌ప్లే స్ట్రిప్ కూడా ఉండనుంది. ఫోన్ పూర్తిగా మూసి ఉన్నప్పుడు కూడా నోటిఫికేషన్లు, ముఖ్యమైన సమాచారం ఈ స్ట్రిప్‌పై కనిపిస్తాయి. దీనివల్ల ఫోన్‌ను ప్రతీసారి తెరవకుండానే అన్ని విషయాలు తెలుసుకోవచ్చు.

* ఫోల్డబుల్ మార్కెట్లో పెరుగుతున్న పోటీ..

ఫోల్డబుల్ ఫోన్ల మార్కెట్ చాలా వేగంగా అభివృద్ధి చెందుతోంది. హువావే (Huawei) వంటి బ్రాండ్లు కూడా కొత్త కొత్త డిజైన్లను పరిచయం చేస్తున్నాయి. ఉదాహరణకు, హువావే ప్యూరా ఎక్స్ (Huawei Pura X) ఫోన్ పక్కకు మడతపడేలా (Sideways folding) వచ్చి, ఫ్లిప్ ఫోన్‌లకు, టాబ్లెట్‌లకు మధ్య ఉన్న గీతను చెరిపేస్తోంది.

ఏదేమైనా, శాంసంగ్ తీసుకురాబోతున్న ఈ 360-డిగ్రీల ఫోల్డబుల్ ఫోన్ మాత్రం ఇప్పటివరకు వచ్చిన వాటిలో అత్యంత సాహసోపేతమైన ఆవిష్కరణ అని చెప్పొచ్చు. ప్రస్తుతానికి ఇది ఇంకా పేటెంట్ దశలోనే ఉన్నా, ఈ డిజైన్ గనుక కార్యరూపం దాల్చితే, ఫోల్డబుల్ స్మార్ట్‌ఫోన్‌ల పనితీరునే పూర్తిగా మార్చేయగలదు.

భవిష్యత్ స్మార్ట్‌ఫోన్ల వైపు టెక్నాలజీ పరిశ్రమను నడిపించగలదు. ఒకవేళ ఇది మార్కెట్లోకి వస్తే, స్మార్ట్‌ఫోన్ల వాడుకలో, సౌలభ్యంలో సరికొత్త ప్రమాణాలను నెలకొల్పడం ఖాయం.