సోనీ నుంచి 42 మెగా పిక్సల్ కెమెరా, 10 ఫ్రేమ్స్ పర్ సెకండ్ స్పీడ్‌తో..

ప్రముఖ ఎలక్ట్రానిక్స్ తయారీ సంస్థ సోనీ ఎ7ఆర్ III పేరిట ఓ నూతన డీఎస్‌ఎల్‌ఆర్ కెమెరాను విడుదల చేసింది. గతంలో వచ్చిన ఎ7ఆర్ IIకు కొనసాగింపుగా ఈ కొత్త మోడల్‌ను సోనీ అందుబాటులోకి తీసుకువచ్చింది. ఈ కెమెరా ద్వారా 10 ఫ్రేమ్స్ పర్ సెకండ్ స్పీడ్‌తో 4కె రిజల్యూషన్ ఉన్న వీడియోలను చిత్రీకరించుకోవచ్చు.

ఇంకో ఆసక్తికర అంశం ఏంటంటే. గతంలో వచ్చిన మోడల్ కన్నా ఈ మోడల్ చాలా తక్కువ బరువును కలిగి ఉంటుంది. సోనీ ఎ7ఆర్ III కెమెరాలో బయాంజ్ ఎక్స్ ప్రాసెసింగ్ ఇంజిన్‌ను ఏర్పాటు చేశారు. దీని వల్ల గత మోడల్ కన్నా ఈ కెమెరా 1.8 రెట్లు వేగంగా పనిచేస్తుంది. ఇందులో 42.4 మెగాపిక్సల్ సామర్థ్యం ఉన్న కెమెరా సెన్సార్‌ను ఏర్పాటు చేశారు.

Image source:Engadget

1.3 సెంటీమీటర్ల నిడివి ఉన్న ఓలెడ్ ఎలక్ట్రానిక్ వ్యూ ఫైండర్ ఇందులో ఉంది. 7.5 సెంటీమీటర్ల ఎల్‌సీడీ టచ్ స్క్రీన్ డిస్‌ప్లేను ఏర్పాటు చేశారు. ఈ కెమెరాలో రెండు ఎస్డీ కార్డు స్లాట్స్ ఉన్నాయి. యూఎస్‌బీ టైప్ సి పోర్టు ఇచ్చారు. వైఫై, బ్లూటూత్ 4.1, ఎన్‌ఎఫ్‌సీ ఫీచర్లు కూడా ఈ కెమెరాలో ఉన్నాయి. దీని ధర రూ.2.08 లక్షలు.